په اذربایجان کې د افغاني محصولاتو نندارتون

د معمار پرس د خبر له مخې؛ د طالبانو د صنعت او سوداګرۍ وزارت یوه مطبوعاتي اعلامیه خپره کړې چې پکې یې اعلان کړی چې د صنعت او سوداګرۍ وزیر نورالدین عزیزي او په کابل کې د اذربایجان جمهوریت سفیر الهام محمدوف ترمنځ په یوه غونډه کې، په اذربایجان کې د افغان محصولاتو او تولیداتو د نندارتون د جوړولو موافقه وشوه. د طالبانو د سوداګرۍ وزارت په دې مطبوعاتي اعلامیه کې ویلي چې د غونډې په جریان کې، د سوداګرۍ د زیاتوالي، د ګډو نندارتونونو د جوړولو، د اذربایجان سوداګرو ته په افغانستان کې د پانګونې فرصتونو معرفي کولو او د لاجوردو سوداګریزې لارې د فعال ساتلو په څیر مسلو په اړه بحث او تبادله وشوه. د مطبوعاتي اعلامیې له مخې، دواړو خواوو د سوداګریزو همکاریو په پراختیا هم ټینګار وکړ او پریکړه یې وکړه چې د سوداګرۍ د اسانتیا لپاره د دواړو هیوادونو د صادراتي توکو لیست شریک کړي.