د معمار خبری آژانس د راپور له مخې، سیمهییزې سرچینې په پکتیکا ولایت کې وايي چې پاکستانی پوځ هوايي بریدونه د دغه ولایت د ارګون او برمل په ولسوالیو کې ترسره کړي دي.
د دغو سرچینو په وینا، په دې بریدونو کې شپږ ملکي وګړي، په شمول د دوو ماشومانو، وژل سوي او اوه تنه نور ټپیان سوي دي. سرچینې زیاتوي چې د ټپیانو په منځ کې شپږ ښځې او یو ماشوم شامل دي. ټپیان د درملنې لپاره نږدې روغتونونو ته لېږدول سوي او د ځینو روغتیايي حالت د اندېښنې وړ بلل سوی دی. د سیمې اوسېدونکي وایي بریدونه هغه مهال سوي چې کورنۍ د شپې د استراحت په حالت کې وې، او چاودنو د سرحدي کلیو څو کورونه ویجاړ کړي دي.
د پېښې وروسته، د طالبانو سرپرست حکومت دفاعي ځواکونه د ډیورند په فرضي کرښه، په ځانګړي ډول د پکتیکا او کندهار په پولو کې، په بشپړ چمتووالي ځای پر ځای سوي دي. سرچینې چې طالبانو ته نږدې دي، اټکل کوي چې ښايي د دغو بریدونو پر وړاندې نظامي ځواب په راتلونکو ورځو کې ورکړل سي.
