ایس. جی شنکر، د هند د بهرنیو چارو وزیر، د طالبانو د حکومت د بهرنیو چارو له سرپرست وزیر امیرخان متقي سره په لیدنه کې اعلان کړی چې نوې ډهلي خپل دیپلوماتیک حضور په کابل کې له «تخنیکي ماموریت» څخه د سفارت تر کچې لوړوي.
دغه لیدنه په نوې ډهلي کې د امیرخان متقي د لومړي رسمي سفر پر مهال ترسره سوې ده.
جی شنکر د متقي سفر «د اړیکو د پرمختګ یو مهم ګام او د افغانستان او هند دایمي دوستۍ تصدیق» بللی او ویلي یې دي چې د دواړو هېوادونو ګډ تعهد د ودې او پرمختګ لپاره د سرحدي تروریزم له ګواښ سره مخ دی. هغه ټینګار کړی چې هند او طالبان باید خپلې هڅې د تروریزم د ټولو بڼو پر وړاندې همغږي کړي.
د هند د بهرنیو چارو وزیر همدارنګه د «نوې ډهلي ژوره لېوالتیا د افغانستان د پرمختګ لپاره» یادونه کړې او زیاته کړې یې ده چې هېواد یې د شپږو نوو پروژو د عملي کولو ژمنه کړې ده. د دغو پروژو جزئیات به له خبرو وروسته اعلان سي.
د هغه په وینا، نوې مرستې د ۲۰ امبولانسونو د ډالۍ کولو په ګډون دي چې پنځه به یې د دې سفر پر مهال د طالبانو د بهرنیو چارو وزیر ته په حضوري توګه وسپارل سي.
همدارنګه ټاکل سوې چې د جمعې په ورځ د خوړو یوه محموله افغانستان ته ولېږل سي، او د ام آر آی او سي ټي اسکن وسایل به هم د هېواد روغتونونو ته برابر سي.
د هند د بهرنیو چارو وزیر ویلي چې نوې ډهلي د طالبانو له حکومت سره د اوبو د سرچینو د مدیریت په برخه کې د همکارۍ لپاره هم چمتو ده.
هغه د خپلو خبرو په یوې برخې کې د افغانستان د کرېکټ د لوبغاړو له پرمختګونو ستاینه کړې او ژمنه یې کړې چې د افغانستان د ملي کرېکټ لوبډلې ملاتړ به پراخ کړي.
