د معمار پرس د خبر له مخې؛ د روسیې د بورسونو یو شمیر غوښتونکي وايي چې په کابل کې د روسیې سفارت او د هیواد “د ساینس او کلتور ماڼۍ” خپلو استازو ته خبر ورکړی چې د طالبانو د لوړو زده کړو وزارت د روسیې بورسونه لغوه کړي دي.
دغو محصلينو ته د روسیې د سفارت چارواکو د پنجشنبې په ورځ، د جنوري په ۱۶مه، د دې پریکړې په اړه خبر ورکړ.
شاوخوا ۵۰۰ افغان محصلينو چې د روسیې د بورسونو په ترلاسه کولو کې بریالي شوي وو، نږدې اته میاشتې انتظار باسي چې دې هیواد ته سفر وکړي ترڅو خپلې زده کړې دوام ورکړي.
دا بورسونه د ۲۰۲۴-۲۰۲۵ تعلیمي کال لپاره وو، چې د لیسانس، ماسټرۍ او دوکتورا درجې یې پوښلې وې، او په کابل کې د “روسیې د ساینس او کلتور ماڼۍ” لخوا همغږي شوي وو.