د معمار خبري آژانس د راپور له مخې، ریچارد بنیټ، د افغانستان لپاره د ملګرو ملتونو د بشري حقونو ځانګړي راپور ورکوونکي، ویلي چې په افغانستان کې پر انټرنټ او ټولنیزو شبکو تازه محدودیتونه د خلکو د بیان آزادي او د اساسي حقونو نقض دی.
بنیټ د جمعې په ورځ (د میزان ۱۸مه) په خپل راپور کې ویلي چې دا محدودیتونه نه یوازې د افغانانو اړیکې له بهرني نړۍ سره ستونزمنوي، بلکې د خپلواکو خبریالانو او د بشري حقونو د ادارو فعالیتونه هم له خنډ سره مخ کوي. هغه ټینګار وکړ چې «د انټرنټ محدود لاسرسی کورنۍ د بشري مرستو له ترلاسه کولو بې برخې کوي او د بشري حقونو د نقضو د څار پروسه لا سختوي.»
هغه زیاته کړه: «که څه هم دا محدودیتونه لا تراوسه په بشپړ ډول نه دي عملي سوي، خو د ټولنې د خبرو اترو او چلند د کنټرول د یوې تګلارې برخه ښکاري. طالبان باید د خلکو بشپړ لاسرسی انټرنټ ته بېرته ور وګرځوي او له هر هغه اقدام ډډه وکړي چې د بشري حقونو د لا نقض سبب ګرځي.»
دغه څرګندونې په داسې حال کې سوي چې په وروستیو کې راپورونه خپاره سوي چې د افغانستان په بېلابېلو سیمو کې انټرنټ ډېر ضعیف سوی، ځینې ټولنیزې شبکې فلټر سوې او د اړیکو وسایل بند سوي دي.
