د ملګرو ملتونو خبرداری: د افغانستان په ختیځ کې د زلزلې شاوخوا ۶۰ سلنه ورک سوي کسان ښځې دي.

د معمار خبرې آژانس د راپور له مخې؛ سوزان فرګوسن، د افغانستان د ښځو چارو لپاره،د ملګرو ملتونو ځانګړې استازې په یوه خبري ناسته کې چې د «افغان ښځو ته عاجل مرسته» په محور وه، څرګنده کړه چې د افغانستان په ختیځ کې زلزله ځپلې ښځې او انجونې د اوږدمهاله کړاوونو او څو اړخیزو ګواښونو سره مخ دي. هغې وویل: «ښځې او انجونې د افغانستان په ختیځ کې د زلزلې د قربانیانو نیمایي څخه زیات او د ورک سویو کسانو ۶۰ سلنه جوړوي.» فرگوسن د خپل وروستی سفر یادونه وکړه چې کنر ولایت ته تللې وه او زیاته یې کړه چې په دې سیمو کې حیاتي بنسټونه له منځه تللي او د ښځو لپاره کافي صحي امکانات نه سته. د هغې په خبره، ښځې اړ دي چې د ابتدایي خدماتو لپاره اوږده واټنونه ووهي، چې دا کار یې د تاوتریخوالي او ځمکنیو ماینونو له خطر سره مخ کوي. د ملګرو ملتونو دې چارواکې خبرداری ورکړ چې د طبیعي ناورینونو وروسته، د کورنۍ په کچه تاوتریخوالی، د بې ځایه کیدلو او د عاید د له لاسه ورکولو له امله زیاتېږي. هغې وویل: «په تر ټولو زیان‌منونکو ډلو کې لږ تر لږه ۴۶۳ کورنۍ پیژندل سوې.» فرگوسن د امیندوارو او شیدې ورکوونکو ښځو وضعیت ته هم اشاره وکړه او ټینګار یې وکړ چې ټولې ښځې او انجونې بیړنیو صحي خدماتو ته اړتیا لري. هغې وویل چې د طالبانو محدودیتونه د ښځو پر کار، زدکړه او تګ راتګ باندې د صحي ښځینه کارکوونکو شدید کمښت رامنځته کړی او دا وضعیت ښځې د بشري مرستو د لاسرسي له پلوه په کړکیچ کې اچوي. هغې د ۲.۵ میلیونه ډالرو غوښتنه وکړه تر څو د ۶ څخه تر ۱۲ میاشتو اضطراري پروګرام عملي کړي، چې موخه یې د زلزله‌ځپلو ښځو او انجونو بنسټیزو خدماتو ته د لاسرسي ښه کول دي.