د معمار خبري آژانس د راپور له مخې، عبداللطیف منصور، د طالبانو د سرپرست حکومت د اوبو او انرژۍ وزیر، د روسیې د انرژۍ اونۍ نړېوال فورم کې د ګډون په هدف مسکو ته سفر کړی دی.
د اوبو او انرژۍ وزارت په یوه اعلامیه کې ویلي، منصور به ددې ناستې په څنډه کې د بېلابېلو هېوادونو له استازو سره وګوري او د اوبو او انرژۍ په برخه کې د همکارۍ د پراخولو، د تجربو د تبادلې او د افغانستان د انرژۍ د ظرفیتونو د معرفي کولو په اړه به خبرې وکړي. په اعلامیه کې راغلي، د دې سفر هدف د نړیوالې انرژۍ په ناسته کې ګډون، د بهرنۍ پانګونې جلب، او د دوامدارې انرژۍ په برخه کې د نظرونو تبادله ده.
د وزارت په وینا، افغانستان هڅه کوي چې د سیمهییزو فرصتونو له لارې د انرژۍ د تأمین او پراختیا په برخه کې فعاله ونډه واخلي. دغه وزارت زیاته کړې چې د روسیې د انرژۍ نړېوال فورم د افغانستان لپاره یوه مهمه موقع ده، څو خپلې وړتیاوې او ظرفیتونه د اوبو او تجدیدېدونکو انرژیو په برخه کې نړیوالو ته وروپېژني او د نوو همکاریو زمینه برابره کړي.
