د طالبانو د امر بالمعروف د قانون د تطبیق لپاره د همکارۍ هیأتونو جوړېدل

د معمار خبري آژانس د راپور له مخې؛ د طالبانو سرپرست حکومت عدلیې وزارت (شنبه، د سنبلې۲۹مه) «د امر بالمعروف او نهی عن المنکر د قانون د تطبیق طرزالعمل» خپور کړ. په دې سند کې راغلي چې تازه تاسیس سوی هیأتونه به د کابل او ولایتونو په کچه یاد قانون عملي کوي. په دې طرزالعمل کې چې په ۱۳ مادو تنظیم سوی او د طالبانو د مشر هبت‌الله اخندزاده له خوا توشیح سوی، ټینګار سوی چې دغه هیأتونه باید د دیني عالمانو او اغېزمنو کسانو په همکارۍ خلک دې قانون ته اړ باسي. د طالبانو په فرمان کې راغلي چې دا هیأتونه به د ولسوالیو له مسئولانو، پوهنتونونو، د بدني روزنې ریاستونو، د سوداګرۍ او صنعت خونو، شرکتونو او اتحادیو سره غونډې کوي. همدارنګه د حج او اوقافو وزارت مکلف سوی چې د دې قانون اهمیت د جوماتونو امامانو ته تشریح کړي څو هغوی خلک ددې قانون د عملي کولو لپاره وهڅوي. د معارف ریاستونه هم مکلف سوي چې د ښوونکو لپاره غونډې جوړې کړي او د ښوونځیو، مدرسو او خصوصي ښوونیزو مرکزونو زده کوونکي دې قانون ته پابند کړي. ښکاري چې طالبان د دې هیأتونو په جوړولو سره خپله څارنیزه کړۍ پر ټولنه نوره هم پراخه کړې ده. تر دې وړاندې، د امر بالمعروف وزارت مأمورانو په وار وار ښځې او ځوانان د ظاهري بڼې او جامو له امله نیولي وو؛ هغه کړنې چې پراخ کورني او نړیوال غبرګونونه یې رامنځته کړي دي.