د سولې نړېواله ورځ؛ اروپایي اتحادیه: د افغانستان د خلکو ترڅنګ د پایداره سولې لپاره ولاړ یو

د معمار خبري آژانس د راپور له مخې، اروپایي اتحادیې د سولې نړېوالې ورځې په مناسبت په یوه خپاره سوي پیغام کې ویلي چې دغه اتحادیه د افغانستان د ټولو خلکو په ځانګړې توګه د ښځو او ځوانانو د سولې، امنیت او خوندیتوب د ملاتړ لپاره ژمنه کوي. په پیغام کې زیاته سوې چې اروپایي اتحادیه د افغانستان د خلکو ترڅنګ ولاړه ده او د اقتصادي ظرفیتونو د پیاوړتیا له لارې هڅه کوي چې د دې هېواد لپاره یو باثباته او هوسا راتلونکی برابر کړي. اروپایي اتحادیې د افغانستان ښځې او ځوانان د پایداره سولې اصلي محور بللي او ملاتړ یې ترې د خپلو برنامو نه جلا کېدونکې برخه ګڼلې ده. د سپتمبر ۲۱مه، د سولې نړېواله ورځ ده چې د ملګرو ملتونو له لوري د سږکال شعار «هنر د سولې په خدمت کې» ټاکل سوی دی. خو سره له دې، په افغانستان کې د بشپړې فزیکي امنیت نشتوالی، د رواني امنیت نه تأمین او د طالبانو له خوا د بشري حقونو نقض د خلکو د جدي اندېښنو وړ ګرځېدلي دي