د روسیې، چین، ایران او پاکستان د بهرنیو چارو وزیران: په افغانستان کې د یوه ټول‌ګډون حکومت جوړول اړین دي

د معمار خبري آژانس د راپور له مخې؛ د روسیې، چین، ایران او پاکستان د بهرنیو چارو وزیرانو له طالبانو وغوښتل چې په افغانستان کې یو ټول‌ګډونه حکومت جوړ کړي. دوی په ګډه اعلامیه کې ټینګار وکړ چې د افغانستان د ټولو قومونو او مذهبي ډلو حقونه او اړتیاوې باید تأمین سي. د دغو څلورو هېوادونو د بهرنیو چارو وزیرانو د ملګرو ملتونو د عمومي اسامبلې د اتیایمې غونډې په څنډه کې په نیویارک کې یوه ګډه اعلامیه د افغانستان په اړه خپره کړه. په دې اعلامیه کې، روسیې، چین، ایران او پاکستان په افغانستان کې د یوه پراخ او ټول‌ګډون حکومت جوړول مهم وبلل او ټینګار یې وکړ چې «واکمنۍ باید د افغانستان د ټولنې د ټولو قشرونو ګټې او آرمانونه تمثیل کړي.» دې هېوادونو په افغانستان کې د ټولو قومي او مذهبي ډلو د حقونو او اړتیاوو په رعایت ټینګار وکړ او وغوښتل چې د افغانستان کړکېچ د داسې میکانیزمونو له لارې حل سي لکه د مسکو فارمټ، د شانګهای همکارۍ سازمان او سیمه ییزې څو اړخیزې ناستې. روسیې، چین او ایران له دې وړاندې هم څو ځله له طالبانو غوښتي وو چې یو ټول‌ګډونه حکومت جوړ کړي او د افغانستان ټولو قشرونو ته په نظام کې ونډه ورکړي. خو طالبانو ادعا کړې چې اوسنی حکومت یې همه‌شموله دی. طالبانو له واک ته د ستنېدو وروسته، د دولت ټولې څوکۍ خپلو ځواکونو ته ځانګړې کړې او د پخواني دولت تجربه لرونکي او لوستي کسان یې له دولتي ادارو لرې کړل.