د امریکا ستنېدل بګرام ته؛ پاکستان: دا موضوع د کابل او واشنګټن ترمنځ ده

د پاکستان د بهرنیو چارو وزارت د امریکا د ولسمشر ډونالډ ټرمپ د وروستیو څرګندونو په غبرګون کې، چې د بګرام د هوايي اډې د بېرته نیولو په اړه وې، وویل چې دا موضوع د افغانستان او امریکا د دوه اړخیزو اړیکو په چوکاټ کې راځي او اسلام‌اباد په دې برخه کې مستقیم دریځ نه لري. شفقت علي خان، د پاکستان د بهرنیو چارو وزارت ویاند، په خپله وروستۍ خبري ناسته کې وویل: «له دیپلوماتیک نظره، د بګرام هوايي اډه د افغانستان او امریکا ترمنځ مسئله ده. البته هر څه چې زموږ په سیمه کې پېښېږي، موږ یې په دقت څارو، خو د وړاندې کولو لپاره ځانګړی نظر نه لرو.» د ټرمپ څرګندونو چې د بګرام د هوايي اډې ستراتیژیک موقعیت او د چین نږدېوالي یې یاد کړي وو، د واشنګټن د جیوپولیټیکي اهدافو په اړه اټکلونه راپورته کړي دي. له دې سره سره، پاکستان له هر ډول څرګند دریځ څخه ډډه کړې او یوازې یې د سیمې پر تحولاتو د څارنې ټینګار کړی دی. تر دې وړاندې چین هم د امریکا د بیا پوځي حضور مخالفت کړی و. کابل باید د پاکستان او «ټې‌ټې‌پي» ترمنځ یو انتخاب کړي په همدې غونډه کې، د پاکستان د بهرنیو چارو وزارت ویاند د خبریالانو د ګڼو پوښتنو په ځواب کې د افغانستان سره د دوه اړخیزو اړیکو په اړه د اسلام‌اباد رسمي دریځ تکرار کړ. هغه د پاکستان د لومړي وزیر د هغو څرګندونو په تړاو، چې د بنو په سیمه کې د وژل سویو ۱۶ امنیتي سرتېرو د جنازې پر مهال سوي وې، وویل: «د لومړي وزیر پیغام ډېر روښانه دی: کابل باید د پاکستان او د پاکستانی طالبانو غورځنګ (ټې‌ټې‌پي) ترمنځ یو انتخاب کړي.» د صادق خان، د افغانستان په چارو کې د پاکستان ځانګړي استازي، د سفرونو په اړه شفقت علي خان ټینګار وکړ چې دغه سفرونه د هغه د منظم دیپلوماتیکو دندو یوه برخه ده او که نوی سفر پلان سي، رسنۍ به خبرې سي. نوموړي وویل: «صادق خان مهم ځای لري او په دوه اړخیزو اړیکو کې د هغه رول پېژندل سوی دی.