د معمار پرس د خبر له مخې؛ په سټاکهولم کې د افغانستان سفارت اعلان وکړ چې وروسته له هغه چې سویډن د نوي شوي افغان پاسپورټونو د نه منلو پریکړه اعلان کړه، سیاسي ماموریت د سویډن د مهاجرت څانګې سره د افغان کډوالو لپاره د بدیل اسنادو د ورکولو په اړه په خبرو اترو کې موافقه کړې ده.
دا اعلان د شنبې په ورځ، د اسد په ۱۸مه، د افغانستان سفارت لخوا وشو.
د دې هوکړې له مخې، هغه افغانان چې په سویډن کې سیاسي استوګنه، ټولنیز خوندیتوب یا د کار جواز لري کولای شي د مهاجرت څانګې ته د بهرني پاسپورټونو یا سفر اسنادو ترلاسه کولو لپاره غوښتنه وکړي.
دا هوکړه د سویډن د مهاجرت څانګې د جنجالي پریکړې وروسته وشوه؛ ادارې مخکې اعلان کړی و چې د ۲۰۲۵ کال د اکتوبر له لومړۍ نیټې څخه، هغه افغان پاسپورټونه چې یوازې د سټیکر یا ټاپه سره نوي شوي وي نور به د اعتبار وړ اسنادو په توګه ونه پیژندل شي.
