د افغانستان او بنګله‌دېش ټینګار پر اقتصادي او دیني همکاریو

د معمار خبري آژانس د راپور له مخې؛ د طالبانو د اوبو او برېښنا وزارت اعلان کړی چې عبداللطیف منصور، د دې وزارت وزیر، د بنګله‌دېش له یو شمېر عالمانو او پانګه‌والو سره د لیدنې پر مهال د افغانستان او بنګله‌دېش ترمنځ د اقتصادي او دیني همکاریو پر پراختیا ټینګار کړی دی. د افغانستان د اوبو او برېښنا وزارت (یکشنبه، د وږي ۳۰مه) خبر ورکړی چې عبداللطیف منصور د غونډو په تالار کې له یو شمېر بنګله‌دېشي عالمانو او پانګه‌والو سره کتنه او خبرې کړې دي. د وزارت په وینا، په دې ناسته کې مذهبي، سیاسي او اقتصادي موضوعات د خبرو اصلي محور و او دواړو لورو خپل نظرونه په دې برخو کې سره شریک کړل. عبداللطیف منصور په خپلو خبرو کې د افغانستان د انرژۍ د تولید په برخه کې د پراخو ظرفیتونو یادونه وکړه او ویې ویل چې حکومت د کورنیو او بهرنیو پانګه‌والو لپاره ټولې لازمې آسانتیاوې برابرې کړي دي. بنګله‌دېشي پلاوي هم د دې لیدنې له امله د خوښۍ څرګندونه وکړه او پر دې یې ټینګار وکړ چې د دواړو هېوادونو ترمنځ اقتصادي او مذهبي اړیکې او همکاری پراخې سي.