سه روز پس از هشدار رییس ستاد مشترک سازمان پیمان امنیت جمعی مبنی بر بسیج هزاران جنگ‌جوی داعش در مرز افغانستان و تاجیکستان، رمضان رحیم‌زاده، وزیر امور داخله تاجیکستان، از آماده‌گی کشورش برای محافظت از مرز‌ها خبر داده است.
به گزارش خبرگزاری معمار؛ رسانه‌های تاجیکستان، گزارش دادند که وزیر امور داخله تاجیکستان این مطلب را در شهر دوشنبه، پایتخت تاجیکستان، بیان کرده است.
رحیم‌زاده گفته است که وزارت امور داخله، کمیته امنیت دولتی و نیروهای سرحدی تاجیکستان برای سرکوب هر گونه تهدید آماده‌گی کامل دارند.
وزیر امور داخله تاجیکستان گفته که در صورت نیاز از نیروهای سازمان پیمان امنیت جمعی نیز استفاده خواهد شد.
این در حالی است که آناتولی سیدروف، رییس ستاد مشترک سازمان پیمان امنیت جمعی، که تاجیکستان نیز عضو آن است، سه روز پیش در یک نشست خبری از تجمع ۴ هزار جنگ‌جوی داعش در نزدیکی مرز میان افغانستان و تاجیکستان خبر داد.
به گفته سیدروف، شمار جنگ‌جویان داعش در افغانستان به ۶۵۰۰ تن افزایش یافته است و این جنگ‌جویان عمدتاً در ولایت‌های بدخشان، تخار و کندز حضور دارند.