ډونالډ ټرمپ: زه د جګړو په حل کې مهارت لرم، چمتو یم د افغانستان او پاکستان ترمنځ منځګړیتوب وکړم

د معمار خبري آژانس د راپور له مخې، ډونالډ ټرمپ، د امریکا متحده ایالاتو ولسمشر، دا څرګندونې د منځني ختیځ د سفر پر مهال، د «ایرفورس وان» الوتکې دننه له خبریالانو سره د خبرو پر مهال وکړې. هغه وویل: «ما اورېدلي چې د پاکستان او افغانستان ترمنځ جګړه روانه ده.» ټرمپ زیاته کړه چې دی ځان د شخړو او جګړو د حل په برخه کې وړ او تجربه‌کار بولي، او که اړتیا وي، د منځګړیتوب لپاره چمتو دی. هغه وویل: «اورېدلي مې دي چې د پاکستان او افغانستان ترمنځ جګړه سوې، زه د جګړو په حل او سولې په رامنځته کولو کې مهارت لرم.» ټرمپ دا هم وویل چې دی د مداخلې لپاره چمتو کېږي او تر خپلې روانې دندې وروسته حاضر دی د دواړو هېوادونو ترمنځ د شخړې د حل په بهیر کې رول ولوبوي. دغه څرګندونې په داسې وخت کې کېږي چې د پاکستان او افغانستان ترمنځ اړیکې په وروستیو ورځو کې سختې ترینګلې سوې او د دواړو هېوادونو ترمنځ د سرحدي نښتو راپورونه ورکړل سوي دي. ټرمپ مخکې هم څو ځله ویلي وو چې که په واک کې پاتې سوی وای، نو د نړۍ اوسني کړکېچونه لکه د اوکراین جګړه او د منځني ختیځ شخړې به نه وای رامنځته سوې. تراوسه د طالبانو او اسلام‌آباد چارواکو د ټرمپ د څرګندونو په اړه کوم غبرګون نه‌دی ښودلی.