د زلزلې او وچکالۍ تر سیوري لاندې په افغانستان کې بشري بحران زیاتوالی

د معمار خبري آژانس د راپور له مخې؛ وروستیو زلزلې او پرله‌پسې وچکالۍ د افغانستان بشري بحران لا شدېد کړی، سلګونه زره خلک یې بې‌کوره کړي او د ژمي د نږدې کېدو سره د سرپناه، خوراک او پاکو اوبو عاجل اړتیا زیاته سوې ده. رویترز شنبه ورځ، د میزان ۱۲مه، راپور ورکړی چې په افغانستان کې مرګ‌ونې زلزلې له ۸ زرو ډېر کورونه تخریب کړي او له ۱۱ زره زیات بې‌کوره خلک د کونړ په موقت کمپونو کې ژوند کوي. د ژمي د نږدې کېدو په مهال، هغه کورنۍ چې د زلزلې یا وچکالۍ له امله بې‌کوره سوې دي، عاجل سرپناه او بشري مرستو ته اړتیا لري. د سور صلیب او سرې میاشتې نړیوال فدراسیون اعلان کړی چې دې ادارې د اضطراري مرستو لپاره د ۳۱ میلیونه ډالرو غوښتنه یوازې د اړتیا وړ بودیجې درېیمه برخه ترلاسه کړې ده. دې ادارې زیاته کړې چې پرته له نورو مالي سرچینو، دوی نه سي کولای کور، خوراک او اړین ملاتړ د کورنیو او ښځو لپاره پراخ کړي. مرستندویه سازمانونو هم خبرداری ورکړی چې د اقلیمی بدلونونو له امله په افغانستان کې وچکالي زیاته سوې او بارانونه کم سوي، او د پاکو اوبو لاسرسی محدود کړی دی. ویل کېږي چې دا شرایط د ناروغیو خپرېدو، سوءتغذیې او د زده‌کوونکو د ښوونځي پرېښودو لامل سوي او د غریبو او شتمنو ترمنځ یې نابرابري لا زیاته کړې ده.