بلجیم د طالبانو سره خبرو ته داخل سو

د معمار خبري آژانس د راپور له مخې؛ انلین فن بوسویت، د بلجیم د مهاجرت او کډوالۍ وزیر اعلان کړی چې دغه هېواد غواړي له طالبانو سره خبرې وکړي ترڅو هغه افغان کډوال چې په غیرقانوني ډول په بلجیم کې مېشت دي یا جرم کړی، بېرته ستانه سي. د بلجیم د مهاجرت او کډوالۍ وزیر زیاته کړه چې دغه خبرې یوازې فني بڼه لري او د طالبانو د واکمنۍ د رسمیت پیژندلو معنا نه لري. هغه وویل چې د اروپا د اتحادیې ډېری هېوادونه د افغان کډوالو د بیرته استولو په برخه کې له ستونزو سره مخ دي او هیله لري چې دغه هېوادونه یو ائتلاف جوړ کړي ترڅو د اوسني بن‌بست ماتولو کې مرسته وکړي. مخکې، د اتریش د فدرالي مهاجرت او کډوالۍ اداره هم د روان کال په پیل کې د افغان کډوالو په اړه د خبرو لپاره افغانستان ته تللې وه. د اتریش ترڅنګ، سویس او آلمان هم په تیرو میاشتو کې له طالبانو سره خبرې کړي او د دې ډلې ډیپلوماتان یې د کډوالو د ایستلو د بهیر د آسانتیا لپاره منلي دي. بلجیم هم د دغو هېوادونو سره یو ځای، غواړي ورته پروسه تعقیب کړي ترڅو هغه افغان کډوال چې غیرقانوني مېشت دي یا جرم کړی، په منظم ډول بېرته هیواد ته وګرځوي.