امیرخان متقي: د افغانستان او پاکستان مثبتې اړیکې د دواړو لورو په ګټه دي

مولوي امیرخان متقي، د طالبانو د بهرنیو چارو وزیر، د پاکستان د جماعت اسلامي د ګوند له پلاوي سره چې د محمد ابراهیم په مشرۍ کابل ته راغلی وو، په لیدنه کې د طالبانو او پاکستان مثبتې اړیکې د دواړو لورو په ګټه وبللې او د پلاو‌و د تبادلې پر اهمیت یې په بېلابېلو کچو ټینګار وکړ. د طالبانو د بهرنیو چارو وزارت یکشنبه سهار (د میزان ۶مه) په یوه اعلامیه کې ویلي چې مولوي امیرخان متقي، د دغه وزارت وزیر، د پاکستان د جماعت اسلامي د ګوند له پلاوي سره چې د محمد ابراهیم په مشرۍ کابل ته راغلی وو، لیدنه کړې ده. د طالبانو د بهرنیو چارو وزیر د طالبانو او پاکستان ترمنځ د پلاوو سفرونه په بېلابېلو سطحو کې مهم بللي او مثبتې اړیکې یې د دواړو لورو په ګټه بللې دي. د پاکستان د جماعت اسلامي د ګوند پلاوي د افغانستان او پاکستان د خلکو ترمنځ پر نږدېوالي ټینګار وکړ او د دواړو لورو ترمنځ د اړیکو ښه‌والی یې د دواړو هېوادونو د خلکو د ژوند د ښه کېدو لپاره ګټور وبله. دغه پلاوي همدارنګه هیله څرګنده کړه چې موجودې ستونزې د دواړو لورو ترمنځ له منځه ولاړې سي. د پاکستان د جماعت اسلامي د ګوند پلاوي دغه راز د دوه اړخیزو اړیکو ښه‌والی د اړیکو د پیاوړتیا لپاره یو عامل وباله او هیله یې څرګنده کړه چې موجود خنډونه به لرې سي.