د معمار خبري آژانس د راپور له مخې؛ عادله راز، د افغانستان پخوانۍ سفیره په ملګرو ملتونو کې، د ملګرو ملتونو د عمومي اسامبلې په څنډه کې اعلان وکړ چې د همه شموله ګډون او روښانه ځواب ورکونې له تضمین پرته، په افغانستان کې هېڅ سیاسي بهیر نه سي کولای مشروعیت او پایښت ولري.
میرمن راز په خپله وینا کې وویل: «موږ نن د غونډې له ګډونوالو درې قوي سپارښتنې واورېدې؛ لومړی، د ریښتیني ټول ګډون تضمین د ټولو افغانانو په ګډون، چې ښځې، ځوانان، لږکي او مدني ټولنې هم په مهمو بهیرونو کې شتون ولري.»
هغې زیاته کړه: «دوهم، د سنجول کېدونکو معیارونو ټاکل او د ځوابویونکي میکانیزمونو جوړول څو ډاډ ترلاسه سي چې هېڅ مشارکت د بشري حقونو یا انساني کرامت د نقض په بیه تمام نه سي.»
د هغې په وینا، درېیم اساسي اصل د هغو حللارو پیاوړتیا ده چې د افغانانو لخوا خپله رهبري کېږي؛ هغه حللارې چې کولای سي مشروعیت او مالکیت هر راتلونکي سیاسي بهیر ته بېرته ورکړي.
د افغانستان پخوانۍ سفیره ټینګار وکړ چې تلپاتې سوله یوازې هغه وخت ممکنه ده چې سیاسي پرېکړې د افغانستان د ټولنې له منځه راټوکېږي، نه دا چې یوازې له بهرنیو خبرو یا د پردې تر شا له موافقو څخه.
د عادله راز څرګندونې په داسې حال کې کېږي چې اندېښنې د قدرت د انحصار، د ښځو او مدني ټولنې د حذف او د افغانستان په اړه د ډیپلوماټیکو بهیرونو د نه شفافیت په اړه زیاتې شوې دي.
