د ملګرو ملتونو راپور ورکوونکی: طالبان د جهادي زده کړو په واسطه د افغانستان د ځوانانو راتلونکی له منځه وړي

د معمار خبري آژانس د راپور له مخې، ریچارد بنیټ د ملګرو ملتونو د ناستې په څنډه کې څرګنده کړه چې د افغانستان له حالاتو مستند راپورونه ددې لپاره حیاتي ارزښت لري چې نړیوال بحثونه د اغېزمنو عملي اقداماتو پر لور وهڅوي. هغه زیاته کړه، د دې اړتیا سته چې د افغانانو، په ځانګړي ډول د علماوو او اسلامي کارپوهانو، د لیدلورو د اورېدو لپاره نور فرصتونه برابر سي او باید ورته جدي پاملرنه وسي. د ملګرو ملتونو ځانګړي راپور ورکوونکي د طالبانو له لوري د مدني ټولنې د ځپلو او د مخالفو ږغونو د چوپولو په اړه هم وویل چې د ګواښونو، وېروونکو کړنو او د غچ اخیستنې سره سره، د طالبانو اقدامات د نړیوالې ټولنې له سترګو پټ پاتې سوي نه دي او لا هم تر څار لاندې دي.