د اسلامي همکاریو سازمان د تماس ډلې غونډه؛ قطر: د افغانستان د ثبات او همکاری لپاره باید دیپلوماتیکې هڅې زیاتې سي

د معمار خبري آژانس د راپور له مخې؛ د اسلامي همکاریو سازمان (OIC) د وزیرانو د تماس ډلې غونډه د افغانستان د وضعیت په تړاو د ملګرو ملتونو د عمومي اسمبلۍ د اتیایمې غونډې په څنډه کې ترسره سوه. محمد بن عبدالعزیز الخلیفي، د قطر د بهرنیو چارو وزیر، په دې غونډه کې ټینګار وکړ چې د غړو هېوادونو ترمنځ د اړیکو او همکاریو د پیاوړتیا او د افغانستان په اړه د تماس ډلې د پرېکړو د اغېزمنې پلي کېدو لپاره باید دیپلوماتیکې هڅې زیاتې سي. الخلیفي د افغانستان د خلکو بې‌ساري ستونزو ته په اشارې سره زیاته کړه چې د اسلامي همکاریو سازمان غړي هېوادونه د دې هېواد د خلکو څخه د معنادارو ملاتړونو په وړاندې کولو مکلف دي. هغه همدارنګه څرګنده کړه چې قطر چمتو دی خپله ونډه د غړو هېوادونو ترمنځ د همکاریو په پیاوړتیا او د افغانستان د خلکو په ملاتړ کې ولوبوي او ټینګار یې وکړ چې د افغانستان د انساني او اقتصادي بحرانونو د حل لپاره باید د غړو ترمنځ اغېزمن او همغږی تعامل رامنځته سي.