د معمار پرس د خبر له مخې؛ د ایران د اسلامي جمهوریت د سړکونو او ښاري پراختیا وزارت چارواکو اعلان کړی چې د ایران او افغانستان ترمنځ به ډېر ژر یو مسافر وړونکی اورګاډی پیل شي.
د ایران د سړکونو او ښاري پراختیا وزیر مرستیال جبار علي ذاکري د چهارشنبې په ورځ (د حوت په ۲۲مه) اعلان وکړ چې “د خواف-هرات د اورګاډي د لارې د مسافرو برخه به ډېر ژر فعالیت پیل کړي.”
هغه دا هم زیاته کړه چې دا پټلۍ به “له اروپا او هند څخه افغانستان ته د ټرانزیټ کارګو په لیږدولو کې مهم رول ولوبوي” او دا چې څو بار وړونکي اورګاډي لا دمخه له ترکیې او هند څخه افغانستان ته لیږدول شوي دي.
ایراني چارواکي وايي چې “د خواف-هرات د اورګاډي لاره نه یوازې د ایران او افغانستان لپاره، بلکې د نورو ګاونډیو هیوادونو لپاره هم ستراتیژیک اهمیت لري.”