رسانه‌ی دولتی پاکستانی گزارش داده است که تا کنون ۴۰۲ هزار و ۳۱۲ مهاجر غیرقانونی افغانستانی به کشورشان بازگردانده شده‌اند.
به گزارش خبرگزاری معمار؛ رادیو پاکستان، رسانه‌ی دولتی پاکستانی امروز (شنبه، ۱۱ قوس) در خبری نوشته است که تنها دیروز سه هزار و ۷۷۶ شهروند افغانستان به کشورشان بازگردانده شده‌اند.
این رسانه افزوده است که بازگرداندن مهاجران بیگانه‌ی غیرقانونی، از جمله شهروندان افغانستان به وطنشان ادامه دارد.
پاکستان در ماه اکتبر برای مهاجران «غیرقانونی»، از جمله ۱.۷ میلیون شهروند افغانستان ضرب‌الاجل تعیین کرد که آن کشور را ترک کنند و در غیر این‌صورت اخراج می‌شوند.
بازگشت و اخراج مهاجران از پاکستان، به وخامت بحران بشری در افغانستان افزوده است.