تاجیکستان خواستار کمک‌های بشردوستانه برای زلزله‌زدگان و مقابله با خشکسالی در افغانستان شد
به گزارش خبرگزاری معمار؛ امام‌علی رحمان، رئیس‌جمهور تاجیکستان، در سخنرانی خود در مجمع عمومی سازمان ملل متحد از جامعه جهانی خواست تا برای رسیدگی به خشکسالی در افغانستان و کمک به زلزله‌زدگان اخیر در شرق این کشور همکاری کنند. وی تأکید کرد که تاجیکستان آماده همکاری در این روند است.
رئیس جمهور تاجیکستان شام روز سه‌شنبه، اول میزان، در مجمع عمومی گفت: «جامعه بین‌المللی را به رساندن کمک‌های بشردوستانه، به‌ویژه به مناطق آسیب‌دیده از خشکسالی و زمین‌لرزه شدید، دعوت می‌کنیم.»
وی افزود که تاجیکستان همواره طرفدار برقراری صلح و ثبات، امنیت کامل و توسعه اجتماعی و اقتصادی در افغانستان است.
رئیس‌جمهور تاجیکستان در بخش دیگری از سخنانش، تروریسم، افراط‌گرایی، قاچاق سلاح، مواد مخدر و سایر جرایم سازمان‌یافته فراملی را تهدیدی جدی علیه امنیت جهانی خواند و بر لزوم همکاری نزدیک با نهادهای بین‌المللی برای مقابله با این تهدیدها تأکید کرد.
وی همچنین از دفتر مبارزه با تروریسم سازمان ملل خواست تا نقش فعال‌تری در کمک به کشورها برای مقابله با تروریسم ایفا کند.
