نهادهای بین‌المللی و شهروندان افغانستانی در پاکستان از تشدید فشارها از سوی دولت پاکستان ابراز نگرانی کرده‌اند.
بر اساس گزارش‌ها، پلیس پاکستان به مالک‌های اماکن رهایشی دستور داده است تا مهاجران افغان را از اماکن خود اخراج کنند. همچنین، گفته می‌شود که به مهاجران افغان که در هتل‌ها و دکان‌ها کار می‌کنند، هشدار داده شده است که کار خود را ترک کنند و به افغانستان بازگردند.
کمیساری عالی سازمان ملل متحد در امور پناهندگان و سازمان بین‌المللی مهاجرت نیز از پاکستان خواسته است تا از مهاجران آسیب‌پذیر افغانستانی حمایت کند. این نهادها گفته‌اند که بازگرداندن اجباری مهاجران افغانستانی، نقض حقوق بشر است.
سمیع الله احمدزی، استاد دانشگاه، گفت که پاکستان باید بر اساس قوانین بین‌المللی با مهاجران رفتار کند. او گفت که سرپیچی از این قوانین، نقض حقوق بشر است.
پبشتر جلیل عباس جیلانی، وزیر خارجه موقت پاکستان، در حاشیه نشست ترانس-همالیا از تصمیم پاکستان برای اخراج مهاجران غیرقانونی دفاع کرده است.
طالبان نیز بازداشت و شکنجه مهاجران افغانستان در پاکستان را خلاف اصول بین‌المللی دانسته و از حکومت پاکستان خواسته است تا فرصت دهد تا مهاجران افغان به‌گونه‌ی مسالمت‌آمیز به افغانستان بازگردند.
