وزیر خارجه پاکستان بر تعامل دوامدار و عملی با افغانستان تاکید می‌ورزد.
به گزارش خبرگزاری معمار وحدت؛ بلاول بوتو زرداری، وزیر خارجه پاکستان در بیست و یکمین نشست شورای سران دولت‌های کشورهای عضو سازمان همکاری شانگهای، می‌گوید که داشتن یک تعامل با مردم افغانستان برای حل بحران اقتصادی و انسانی در این کشور مهم است.
در بخشی از اعلامیه‌ی وزارت خارجه پاکستان آمده‌است: «بلاول بوتو زرداری بر اهمیت تعامل عملی و پایدار با افغانستان در زمینه همکاری با مردم افغان برای غلبه بر بحران انسانی و اقتصادی که دچار کشور‌شان شده است، تاکید کرد.»
بر بنیاد این اعلامیه، آقای زرداری بر دستیابی به صلح و امنیت پایدار و پیکار با هراس‌افگنی در منطقه نیز تاکید کرده‌است.
گفتنی است در نشست سران سازمان همکاری شانگهای که روز گذشته به‌گونه مجازی برگزار شد، مقام‌ها و نمایندگان چین، کازاخستان، قرقیزستان، روسیه، تاجیکستان، ازبیکستان و کشورهای ناظر این سازمان، شرکت کرده بودند.
