حمدالله محب: بازگشت ۲۳۰۰ سرباز پناه‌برده به تاجیکستان به کشور

0
memaarpress.com - خبرگزاري معمار وحدت

 ۲۳۰۰ سرباز اردوی ملی که براثر شدت جنگ با طالبان در بدخشان به تاجیکستان پناه برده بودند دوباره به صفوف نیروهای امنیتی و دفاعی کشور بازگشتند.

به گزارش خبرگزاری معمار وحدت ؛ حمد الله محب مشاور شورای امنیت ملی می‌گوید: “۲،۳۰۰ تن از سربازان افغان که به تاجیکستان پناه برده بودند، دوباره به صفوف‌شان باز گشته اند. بعضی از آن‌ها که ولسوالی‌ها را ترک کرده بودند، اکنون در چهارچوب نیروهای دفاعی در مراکز ولایت‌ها حضور دارند. آن‌هایی که به تاجیکستان پناه برده بودند، دوباره برای خدمت و دفاع از مردم فیض آباد باز گردانده شده‌اند.”

به دنبال شدت یافتن جنگ‌ها و حمله‌های طالبان در شمال و شمال‌شرق افغانستان، صدها تن از نیرو های امنیتی از بدخشان به تاجیکستان پناه بردند.

ولسوالی‌های این ولایت هم به صورت پیهم به دست طالبان سقوط کرده‌اند.

نماینده‌های ولایت بدخشان در شورای ملی گزارش می‌دهد که از میان ۲۷ ولسوالی بدخشان، تنها کران و منجان در دست دولت و متباقی ۲۶ ولسوالی دیگر در ادارۀ طالبان است.

تاجیکستان به شدت از خرابی وضعیت امنیتی در مناطق مرزی افغانستان با این کشور نگران است.

امام علی رحمان، رئیس جمهور تاجیکستان روز دوشنبه (۱۴ سرطان) دستور داد که ۲۰ هزار نیرو در مرز میان کشورش و افغانستان گماشته شوند.

رحمان وضعیت امنیتی افغانستان را نگران کننده دانسته و از اداره‌‌های امنیتی کشورش خواسته است با اقدام‌های مشخص در مرز این کشور با افغانستان، امنیت تاجیکستان و شهروندانش را قطعی کنند.

روسیه هم که یک پایگاه نظامی بزرگ در تاجیکستان دارد، دیروز گفت که در صورت نیاز برای ثبات مرزهای تاجیکستان با افغانستان، آمادۀ هر گونه همکاری است. هلیکوپترهای روسیه هم تمرینات نظامی را در خاک تاجیکستان راه اندازی کرده‌اند.

افغانستان حدود ۱،۳۷۵ کیلومتر مرز مشترک با تاجیکستان دارد.

مقام‌های تاجیکستان روز دوشنبه (۱۴ سرطان) گفتند که طالبان، ۹۰۰ کیلومتر مرز میان این کشور و افغانستان را تحت کنترول خود دارند.

انتهای پیام

پاسخ دادن

دیدگاه خود را وارد کنید
لطفا نام خود را وارد کنید