عقب‌نشینی ۳۰۰ نیروی امنیتی افغان به تاجیکستان

0

رسانه‌های تاجیکستانی، گزارش داده اند که بیش‌تر از ۳۰۰ تن از نیروهای امنیتی افغانستان، پس از درگیری با جنگ‌جویان طالب در ولایت بدخشان، به تاجیکستان عقب‌نشینی کرده اند.

به گزارش خبرگزاری معمار وحدت ؛ خبرگزاری خاور روز شنبه (۱۲ سرطان) به نقل از مرکز رسانه‌های نیروهای مرزی کمیته‌ دولتی امنیت ملی تاجیکستان، گزارش داده است که نیروهای امنیتی افغانستان پس از درگیری با جنگ‌جویان طالب و مقاومت شدید در برابر این گروه، به خاطر حفظ نیروی بیش‌تر به خاک تاجیکستان عقب‌نشینی کرده اند.

در این گزارش، آمده است؛ مناطقی که در آن میان نیروهای امنیتی و جنگ‌جویان طالب درگیری جریان داشت، به گونه‌ی کامل در اختیار طالبان در آمده است؛ اما اوضاع مرزی تاجیکستان با افغانستان در کنترل مرزبان‌های تاجیکستانی قرار دارد.

ولایت بدخشان افغانستان، با تاجیکستان مرز مشترک دارد و به گفته‌ی منابع محلی، در دو روز گذشته، هفت ولسوالی این ولایت به دست طالبان سقوط کرده است.

در حال حاضر، ولسوالی‌های درایم، وردوج، تیشکان، کشم، تگاب، یفتل پایین و شهر بزرگ، در کنترل جنگ‌جویان طالب است.

این در حالی است که پیش از این نیز، در نتیجه‌ی درگیری‌ها در ولایت کندز، ۱۳۴ نفر از نیروهای امنیتی افغانستان، از ‏طریق شیرخان‌بندر، وارد خاک تاجیکستان شدند‎.‎

به دنبال ادامه‌ درگیری‌ها در ولایت بلخ نیز، گفته می‌شد که ۱۷ سرباز امنیتی پس از درگیری با ‏جنگ‌جویان طالب، به خاک تاجیکستان پناه برده اند؛ اما محمدفرهاد عظیمی، والی بلخ، این موضوع را رد کرد.

پاسخ دادن

دیدگاه خود را وارد کنید
لطفا نام خود را وارد کنید